رمضان كريم

كل سنة و انتم طيبين

رمضان خلاص علي الابواب

ربنا يجعلنا من عتقاء شهر رمضان

مصر و المصريين من الشعوب اللي ليهم في كل همسة

عادات و طقوس غير

و من اجمل شهور السنة في مصر شهر رمضان الكريم

رمضان في مصر له شكل و طعم تاني خاااااالص

من لم يحضر رمضان في مصر لم يري رمضان

تلاقي الدنيا كلها زينة و فوانيس و نور في كل حته

و موائد الرحمن منشرة في الشوارع لخدمة الصائمين

يعني لو الاذان اذن عليك في مصر و انت في الشارع

هتلاقي اكتر من مائدة رحمن عليها كل ما تشتهي الانفس

من طعام و ببلاش

و من اهم عادات المصرين القديمة في رمضان

اكل المكسرات في السهرة و كمان وضعها في الحلويات الرمضانيه زي الكنافة و القطايف

و من الاكلات المشهورة في رمضان الخشاف

المكون من التين المجفف و المشمش المجفف

والقراصية و الزبيب و البلح

ومن اشهر المشروبات اللي بيفطر عليها المصرين قمر الدين

اللي هو اصلا برضوا بيصنع من المشمش

المهم

كل الحاجات اللي فوق دي و اللي ذكرتها بالتفصيل الممل

بنستوردها من الخارج بالعملة الصعبة

و بنستوردها با لملايييييييين

عادي ما عنديش اعتراض خاللي المستوردين يستوردوا و يغتنوا

و خاللي الناس تاكل و تنبسط

ده لو الاحوال تمام

لكن دلوقتي و في الظروف اللي احنا فيها دي

و الناس مش لاقيه شغل

و اللي بيشتغلوا مش ملاحقين علي ارتفاع الاسعار

و البلد الاقتصاد عامل فيها كده
و زي مابيخوفونا البلد هتفلس و هتحصل مجاعة
في وسط ده كله
الاقي هذا الكم من ياميش رمضان المستورد بالعملة الصعبة
و غالي جدا
و ناس كتييييييير واقفة تشتري بالكميات

و كمان ما حرمناش الاطفال من فانوس رمضان الصيني

هو خلاص مش عارفين نعمل حتي فانوس رمضان في مصر

ده فانوس رمضان اختراع مصري اصيل

ميه في الميه من ايام الفاطمين

ده كلام !!

مش مصدقة
طيب البلد فيها فلوس نستورد ده كله

و لا مافيهاش
هنفلس و لا مش هنفلس

في ازمة دولار و لا مافيش

الله يرحم الزعيم الراحل جمال عبد الناصر

اللي منع استيراد الحاجات دي كلها

ايام الاحتياج للعملة الصعبة لتسليح الجيش
و مامتناش
و ما اعتقدش ان ممكن نموت لو ما اكلناش ياميش في رمضان
و الاطفال مش هتتجنن و يجري لها حاجة لو ما اشترتش فانوس رمضان الصيني
اللي اصلا بيكسروه في اول يوم من رمضان
هقول ايه ؟؟ !!
بلد فيها كل حاجة و عكسها
كمان المحلات اللي عارضة عندها حاجات رمضان

بشكل استفزازي عاملين انوار و زينة

في الوقت اللي الكهربا بتقطع بالساعات

و كمان المفروض نوفر في الطاقة

ما فيش حاجة تردع الناس دي و تحسسها باللي احنا فيه

؟؟

و ان ماينفعش نهدر العملة الصعبة علي الحاجات دي
و ان المفروض نرشد الاستهلاك شوية

!!

و يعلمها ان ده اسراف في غير محله

و هنا عايزة اعرف فين الخطاب الديني الصح

بدل الفتاوي الغريبة المريبة اللي كل شوية تطلع علينا
ما يوعوا الناس و خصوصا البسطاء منهم

اللي بيقطعوا نفسهم علشان يشتروا حاجات رمضان

علشان مايحرموش عيالهم

هقول ايه ؟ !

كل سنة و انتم طيبين و بعوده الايام

رمضان كريم

View the Original article