واحد خواجة
و كلمة خواجة من التراث المصري القديم
و هي كلمة تقال علي اي حد مش من مصر
غريب يعني
و هي في الاصل كلمة فارسية معناها السيد
و في التركية معناها الاعلي مقام
المهم
صديقنا الخواجة ماكنش زار مصر
من قبل
و لكنه عاشق لمصر جدا و يكاد حافظ معالمها عن ظهر قلب
و خصوصا كل ماهو فرعوني
وصل مصر اليومين دول
في زيارة ليست قصيرة
انبهر بكل شئ في مصر
و قال با لانجليزي و انا هترجمها بالعامية طبعا
قالك ايييييييه ؟
( انا قتيل البلد دي )
انا هقعد هنا
و هشتغل هنا
وهقضي باقي عمري هنا في مصر
سألناه ليه ؟
مش للدرجة دي يعني
رد بستغراب هو في اجمل من كده
دي مصر بلد الحريات
؟؟!!
يا عم الخواجة الناس قايمة بثورة
بتطالب بالحرية
و مقطعين بعض
و انت جاي تقول لي بلد الحريات
قالك هو في حرية اكتر من كده
!!
انتوا عايزين حرية اكتر من كده ايه
كل واحد بيعمل اللي هو عايزه
ما فيش ممنوعات
و لا بتدفعوا مخالفات علي اي مخالفه بتعملوها
و بعدي الشارع من اي حته تعجبني
في الوقت اللي يعجبني
و بمشي في وسط الشارع مش علي الرصيف في وسط العربيات زي البهلوان و دي بصراحة متعة كبيرة
و ما حدش بيقول لي انت بتعمل ايه
و برمي ورق في الشارع و ماحدش بيكلمني
في بلدي لو اكلت شوكولاته في الشارع انا حر بس افضل ادور علي صندوق قمامة علشان ارمي الورقة بتاعتها
ضحكت و قلت له
لأ بصراحة دي عطلة كبيرة
كمل يا خواجة اشجيني
و بشوف ناس سايقه عكس الاتجاه عادي
و بيركنوا في اي حته
حتي لو هيعطلوا الشارع
و كل عماره ما فيهاش دور شبه التاني
كل واحد عامل واجهة شقته زي ماهو عايز
و ده منظر رائع
قلت له المناظر دي في العمارات القديمة فقط لكن المعمار الجديد ده ممنوع
و كمان الجيران بتضايق بعض عادي
و ما حدش بيشتكي
و حكي لي انه كان معزوم عند صديق له و الجيران كان عندهم حفلة و الدي جي عندهم كان عالي جداااااا
و ماعرفناش نقعد في هدوء و لا نسمع بعض ده غير الدبدبه علي السقف من الرقص
و لما قلتلهم ماحدش هيطلب لهم البوليس
قالوا دي ناس مبسوطة بخطوبة بنتهم
و كمان المحلات في و سط البيوت
و مافيش محل مش طالع بالبضاعة علي بره
و القهاوي واااااااو
في الشارع و علي الرصيف
(مبهووووور اوي هو بالقهاوي)
اللي علي الرصيف في وسط بحر الطريق
و الناس قاعدة و مبسوطة
و ماحدش معترض ان مافيش رصيف يمشوا عليه
حريه مالهاش حدود
و كان يوم مالوش معالم لما اخدوه العتبه
هاص هناك
و طبعا هو معجب بالمصرين
بيقول تعاملهم جميل
و كأنك مصاحب الشعب كله
و كل ما تعدي علي حد يقولك اتفضل يا خواجة
و علموه كلمة شكرا يا خبيبي
شوفتوا الفوضي و الاستهتار اللي احنا عايشين فيها
طلعت حريات ازاي
!!
ما حدش عاجبه حاله
واضح ان القوانين و النظام في بلد الخواجه
خنقته فا قرر يعيش معانا يشاركنا الفوضي
و طلعت مصر ام الدنيا
بلد الحريات
يا جدعاااااان
مرحبا بك يا خواجة في بلد الحريات
View the Original article
0 comments:
Post a Comment