رب رمضـــــان !!!
النهاردة قابلت صديقي ” طــه ” .. قعدنا نرغي مع بعض شوية .. وهو أستاذ في “الألش ” وأنا بتخنق منه لما بيألش .. غصب عني طلعت جملة ” لولا إحنا في رمضان والدنيا صيام أنت عارف كان ممكن يجرالك إية ” .. الجملة دي بنسمعها كتييير جداً .. وبنرددها أكتر لما نكون هنعمل حاجة غلط .. ماحدش فينا فكر في الجملة دي شوية .. الجملة دي ليها معنى واحد ومالهوش تاني .. معناها إن في شهر رمضان في ( أستغفر الله العظيم ) رب تاني .. رب لشهر رمضان فقط .. وباقي السنة رب تاني !!! .. أيوة .. دة اللي للأسف أغلبنا بيعمله ومش واخد باله .. كارثة !!! .. هتقولي إية .. أنت مكبر الموضوع قوي .. وماتدخلش ف نية الناس و … لأ .. الموضوع كبير بس إحنا مش واخدين بالنا .. تعالوا نفكر فيها شوية مع بعض وببساطة .. تلاقي دايماً واحد يجي يضرب أو يأذي حد ومرة واحدة يسكت ويقوله ” اللهم إني صائم ” أو ” حظك إن إحنا صايمين ” .. واحد تاني يتنرفز من زميله فيقوله ” كلها كام يوم و أفوقلك ..صبرك عليا بس ” .. وواحد تاني يتوب في شهر رمضان عن معصية معينه ويرجعلها تاني بعد رمضان .. طب إية ؟؟ .. كل دة عادي ؟؟
لأ طبعاً .. دي مصيبة .. إحنا كدة بنعمل إله تاني من غير ماناخد بالنا .. بنعمل رب لشهر رمضان فقط مختلف تماماً عن رب باقي السنة .. إصحوا !! .. شهر رمضان لتذكرة الغافلين ولتوبة العاصيين .. مش لتكفير الذنوب الشهر والرجوع ليها بعد ما الشهر يخلص .. إستغلوا شهر رمضان في التقرب أكثر إلى الله عز وجل وتوبوا إليه .. و إوعوا ترجعوا لذنوبكم تاني بعد ما تطهرتم منها في هذا الشهر الكريم .. ونختم بجملة لفؤاد حداد من قصيدة “المسحراتي ” :
السعي للصوم خير من النوم
دي ليالي سمحه نجومها سبحه
ورمضـــــــــــــان كريــــــــــــــــــم 
View the Original article
0 comments:
Post a Comment