النداء الاخير يااااااااامرسي

يااااااااامرسي هقولك للمرة الاخيرة الحق نفسك قبل القطر ما يدهسك . بيان القوات المسلحة الاول اوجز وانجز  اي جاب من الاخر يا تحلها يا هو هيحلها اي الجيش .طيب نشوف كده لو انت ما حلتهاش ايه اللي هيحصل علي الساحة الجيش ها يعزلك و تبقا كده دخلت نفسك في خانة المطرودين من رحمة شعوبهم في التاريخ المصري بل في التاريخ العالمي….!! طيب نقول ايه تعالي نحلها سوا كده انت و انا الفقيرة الي الله اللي ماليش في الحكمة و لا السياسة زيكم. انا مواطنة مصرية بسيطة علامي علي قدي لكن مواطنة زي كل الملاين اللي طلعولك و قاعدين لك في الشوارع . طيب انصحك بأيه علشان ما بقاش اتخليت عنك . ياريس ( الي الان ) تقدر تحلها بانك تطلع تكلم الشعب كل الشعب اللي في الشوارع مش تكلم اهلك عشيرتك كلمهم كلام عدل موزون يدخل العقول مش اي كلام لا يودي و لا يجيب زي اللي قبله و اللي قبله . تقول ايه بقا ؟؟

اولا : اعترف بتحيزك لأهلك وعشيرتك و انك مكنتهم من كل الوظائف السيادية في مصر .

ثانيا : اعترف بانك اهملت المواطن العادي الفقير لصالح مصلحة الجماعة اللي هي اهلك و عشيرتك . اي اعترف بكل المصايب اللي عملتها .

ثالثا : اعمل مصالحة مع المعارضة الشريفة اللي اتهمتهم بالعمالة و الخيانة و و طعنتهم في صميم وطنيتهم و مصريتهم اتهمتهم بالبلطجه و لما اتهاجمت مقراتكم بتاعة الجماعة اهلك و عشيرتك لقيوا فيها مواد حارقة و مولوتوف بهدف القتل في الشعب المصري فعرف الشعب مين البلطجية اخيرا .

 رابعا : و ده الاهم نادي بأنتخابات مبكرة لمجلس الشعب و الرئاسة و قبلهم حل مجلس الشوري المشين بتاعك. لو عملت كده يبقا تمام و لو اني خايفة بعد البيان القوي بتاع القوات المسلحة ده يكون فات الاوان . نيجي بقا لكم يا جماعة الاخوان  المتأسلمين، السلاح اللي كل شوية يتمسك مع اهلك و عشيرتك و السؤال هتعملوا بيه ايه ؟ هتحاربوا بيه مين ؟ كفار مكة اللي همه في الشوارع قاعدين لك ؟ و لا الجيش المصري اللي سكت علي ظباطه و عساكره اللي اتقتلوا و اتخطفوا من قبل اهلك و عشيرتك ؟ الجيش رمي الكورة في ملعبك ياريس الان 48 ساعة يا يتهد المعبد علي رأسك انت و عشيرتك و اهلك ياتنجي انت و عشيرتك . ولو ان خلاص بقا بينكم و بين الشعب في قبلي و بحري دم و مش اي دم بس ده بقا بحور دم.

ياريت يا ريس مرسي و انت بتقرر و قبل ما تفكر هتعمل ايه افتح اقرب تلفزيون جنبك و شوف الناس في الشوارع عامله ايه و بتعمل ايه قدرت تكره الناس فيك وفي اهلك وعشيرتك واتصور انكم سوف تكونوا منبوزين في المجتمع لفترة زمنيه ليست بالقصيرة. الا اذا عملت حل صح يجمل صورتكم شوية امام الشعب علشان تعرفوا تعيشوا و سطنا تاني . كلمة اخيرة يا ريس و انت ماشي ابقا اقفل الباب بالراحة ما تهبدوش في ناس كبيرة نايمة

View the Original article