حزب النور

عايزة افهم انا موضوع حزب النور موضة العصر ده في ايه  ان شاء الله

يعني مانزلوش الثورة  مع الشعب و قالك ده خروج علي الحاكم و ماينفعش كده و دي فتنة و العجلة و الاستقرار و بعد ما الناس اتسحلت و اتقتلت و عيونهم راحت و مبارك اتخلع و ذهب بلا راجعة و  اصحابهم و حبايبهم الاخوان المسلمين اللي نطوا بعزم مافيهم يشوفوا هيخدوا قد ايه من الكيكة  اقنعوهم تعالوا الحاكم مشي و نحط ايدينا في ايدين بعض و هنعمل الامارة الاسلامية ونبقا قوة اسلامية مع بعض و كأن باقي الشعب كفرة !! و استعدوهم علي المجتمع علشان الاستفتاء يجي زي ما الاخوان عايزين و يظبطوا الدنيا تروح لصالحهم و بعد ما عزموهم علينا العزومة عجبتهم راحوا قاعدين و عملوا احزاب من اشهرهم حزب النور اللي طالع لي في المقدر جديد مايضرش اهلا بيهم ماقلناش حاجة مصر تساع من الحباااااااااايب الفين حزب و عايزة احط تحت كلمة الحبايب الفين دي مليون خط ورا بعض .عملتوا احزاب ماشي بس ماتنسوش نفسكم و انكم اعوان الاخوان صحيح همه ادوكوا علي قفاكم بعد ماتمكنوا من الحكم و مادكوش حته من الكيكة اللي وعدوكوا بيها و لا عبروكوا و لا ادوكوا منصب واحد حتي .  بس علي مين ! ده انتوا بتبقوا حبايب في ثانية لما يظهر تاني حديث المصالح و يزغللوا عينيكم بمطمع جديد من مطامع الدنيا و ماتنسوش ان فيكم جهادين و ارهابين معروفين بالاسم و بكل جرايمهم القديمة

و اوعوا تكونوا فاهمين ان الشعب ده ممكن يضحك عليه و انه  مش عارف ان ليكم ناس كتييييييييييييير في اعتصام ميدان رابعة العدوية معتصمين مع الاخوان و يمكن كمان يكونوا اكتر من الاخوان نفسهم  

و انكم مشتركين في الحوار الوطني  علشان تبقوا عين يتعرف بيها ايه اللي بيحصل و تعرقلوا مسيرة اي حاجة في اي حاجة نجحتوا ما نجحتوش اديكم مع الاخوان في اعتصام ميدان رابعة العدوية وحبايب خالص . يعني ماسكين العصايا من النص شغل بولوتيكا مالوش دعوة بالاسلام نهائي

و اوعوا تفتكروا ان الشعب ده ممكن تضحكوا عليه تاني

و اوعوا تفتكروا انكم هتاخدوا مكان الاخوان

و ان الشعب ده هيسلم دقنه لدقن تاني

و ان كانت امريكا فاهمة انكم كارت تاني بدل كارت الاخوان اللي اتحرق يحققوا بيه حلمهم في تدمير الشرق الاوسط وتحقيق التقسيمة الجديدة يبقوا واهمين

فرجعوا نفسكم ياتتشالوا من المشهد السياسي من اساسه

و خصوصا بعد ما دكتور سعد الدين فضحكم و قال انكم عرضتم عليه يقدمكم لأمريكا بديل للأخوان، بسرعة بتعرضوا نفسكم هو ده الدين هو ده الاسلام بتعملوا فتنه علشان السلطة و الكراسي و الدنيا الغرورة فين بقا الكلام اللي بتقعدوا تقولوه من علي المنابر للناس . فين الدعوة اللي المفروض تكرسوا ليها حياتكم لأعلاء كلمة الله

اندمجوا في المجتمع و حققوا التسامح و الوسطية حتي لا يتم اقصائكم من المجتمع تماما و مش الحكومة او السلطة اللي هتقصيكم بالعكس اللي هيقصيكم هم الشعب نفسه اللي كشفكم علي حقيقتكم و عراكم انتوا و كلامك المنافي لما تفعلون

View the Original article