مبارك

انا مش فاهمه ايه الهيصة اللي حاصلة دي و الانزعاج ده كله من حكم المحكمة الذي بيقضي بأخلاء سبيل مبارك الرئيس المخلوع مالم يكن مطلوب علي زمة قضية اخري و احالة هذا الحكم الي النيابة العامة للبت في ذلك.

هو في ايه خلاص كده بقينا ناخد ديل الكلام و نطير بيه ونعمل بلبلة. بدل ما نفهم و نفصص الموضوع بالراحة كده قبل مانتكلم و نفتي و نهيج الراي العام و نبتدي نندب و نلطم و تحصل فتنة.و اسمع بقا ان خلاص مبارك راجع ؟؟!!. ايوة هو ممكن يخلي سبيله ماشي لكن ده مش معناه ان هو اخد براءة ياخلق هو !! لأ دي اجرائات قضائية فقط لا غير ماينفعش يتسجن احتياطي علي زمة قضايا اكتر من سنتين افهموا و عوا .

احب اقول لكم مبارك هيتحاكم هيتحاكم ياجماعة . و جاري محاكمته و القضايا كتير علي دماغة. و بعدين مش دي الاتفاقية اللي تمت  مع نظام مرسي اللي اعلن عنها في بجاحة منقطعة النظير . الم يروج نظام مرسي للصلح مع الناس دي كلها نظير اعادت الاموال التي نهبوها و كان اعوانهم في كل مكان يروجون لفكرة ماذا سنفعل بسجنهم نأخذ الاموال تنفع البلد ؟؟ !! طيب زعلانين ليه بقا مبارك دفع ال 18 مليون جنيه بتوع هدايا قضية جريدة الاهرام و عمل اللي عليه في الاتفاق هو ماله بقا ان الشعب قام و شال نظام مرسي كله كله مبارك مالوش دعوة هو عايز الاتفاق يتم .و احمدوا ربنا ان نظام مرسي مشي فعلا كانوا هيدوه براءة هو واعوانه نظير الفلوس .

و بعدين انتوا خايفين من ان مبارك يرجع !! ؟؟ ازاي يعني الرجل في اخر ايامه خلاص، للدرجة دي رجل مسن مريض ممكن يعمل لنا رعب كده يعني احنا خايفين من مبارك و مش خايفين و كمان ناسين شفيق اللي ماصدق و عمال كل شوية يطلع علينا بتصريح شكل و مستفذ اكتر من اللي قبله ؟؟ !! عموما الرئيس المؤقت اصدر قرار بوضع مبارك تحت الاقامة الجبرية في محل اقامة معلوم . يعني لا هيروح هنا ولا هنا . طيب ياريت نعرف يعني ايه اقامة جبرية ؟؟ يعني المتهم يتم جبره علي الاقامة في مكان معين عادتا بيكون منزله تحت مراقبة مشددة و لا يتصل باحد غير معلوم و يراقب مراقبة شديدة و يمثل امام المحكمة في  التوقيتات المحدده للقضية اذا كان عليه قضايا و عادتا تكون الاقامة الجبرية للأشخاص المربوطين علي زمة قضايا سياسية او من الممكن ان لايكون هناك قضايا و لكن الدواعي الامنية تحتم علي السلطات ان تضع الشخص تحت الاقامة الجبرية .

طيب نفهم من كده ان الحكومة مش هتسيبه كده يتفسح ده حتي من باب الامن يعني من بعد ماحافظوا عليه ده كله و طيارة رايحه و طيارة جاية هيسيبوه كده يتفسح لأ طبعا مبارك لو مات في قضايا خلاص بخ هتنتهي و تسقط بكل مافيها و في قضايا هتتعاد من جديد فوقوا شوية خالينا نفوق للي احنا فيه الان و نركز بلاش تدخلونا في قضايا فرعية .

View the Original article